(cette page n'est pas en créole mauricien mais seychellois : Kreol Seselwa)
LAPEL POUR PREZANTASYON
XVIenm Kolok Enternasyonal pour Letid Kreol
"Monn Kreol, Lalang Kreol ek Devlopman: Defi Edikasyonnel, Kiltirel e Ekonomik"
28 Oktob 2018 - 3 Novanm 2018, Mahé, Sesel
Komite Enternasyonal Letid Kreol (Comité International des Etudes Créoles (CIEC)) in organize bann konferans enternasyonal lo letid Kreol regilyerman pandan sa dernyen 50an. An 2018, XVIenm Kolok Enternasyonal Letid Kreol pou fer Sesel; lorganizasyon sa kolok in ganny konfye a Liniversite Sesel, an kolaborasyon avek Komite Enternasyonal Letid Kreol (CIEC).
Prezantasyon
XVIenm Kolok Enternasyonal Letid Kreol pou santre lo:
"Monn Kreol, Lalang Kreol ek Devlopman: Bann Defi Edikasyonnel, Kiltirel, e Ekonomik".
Sa tenm i envit bann filozof, istoryen, antropolog, ekonomis, sosyolog, lengwis e lezot serser dan kad lasyans sosyal e imen pour prezant zot travay lo bann sosyete Kreol kontanporen dan zot evolisyon istorik, lengwistik, sosyal, politik, ekonomik e kiltirel.
Kolok pou fokaliz lo sa kat tenm mazer:
- A. Lalang Kreol ek ledikasyon
- B. Bann monn Kreol ek zot defi vizavi devlopman, sirtou dan konteks kiltirel e ekonomik
- D. Bann lalang Kreol dan en lanvironnman miltileng: deskripsyon ek lanaliz dinamik bann lalang Kreol
- E. Gramer Kreol: tipolozi, varyasyon ek lansennyman
Prezantasyon bann tenm konferans
A. Lalang Kreol ek ledikasyon
Fas a bann defi ledikasyon pour tou, sirtou dan bann lekol debaz ek primer, bann pei souveren ki servi en Kreol Franse in entrodwir en serten degre lansennyman lalang Kreol dan zot lekol. Serten pei, parey Ayti ek Sesel, in akimil en gran leksperyans dan sa domen, ki merit ganny egzaminen. Moris osi in resaman anbark lo sa larout, e sa osi i demann evalye. Bann pei kreolofonn Outremer ki zot Kreol i ganny rekonnet koman lalang rezyonal Franse i osi benefisye avek bann teks ki reglemant lansennyman lalang rezyonal an Frans: zot osi zot annan bokou pratik edikasyonnel pour partaze.
B. Bann monn Kreol ek zot defi vizavi devlopman, sirtou dan konteks kiltirel e ekonomik.
Nou tourn ver antropolozi ek listwar lemonn Kreol pour sey konpran ki mannyer bann formasyon sosyal ki kreolofonn, e ki’n formen an rezilta lenperyalizm Eropeen, pe fer fas avek bann defi devlopman ek globalizasyon. Rol bann lalang Kreol dan devlopman lekonomi (leg. tourizm, ki mannyer bann imigran i ganny resesvwar…), i bezwen ganny evalye.
Prodiksyon literer dan bann zil kreolofonn dan Karaib ek Losean Endyen in devlop en kantite pandan sa bann dernyen lannen, ki swa an Franse, an Angle e menm an Kreol. Letid sa renouvelman literer ek bann pratik kiltirel i osi form parti tenm B.
Mouvman migratwar bann dimoun ki koz Kreol (vwar osi tenm D) pou osi ganny diskite.
Ki direksyon enstitisyonnalisazyon bann lalang Kreol pou pran dan zot bann diferan sfer lenfliyans (vwar osi kestyon bann lakademi lalang Kreol)? Bann pratik militan Kreol i kapab ganny mansyonnen osi.
D. Bann lalang Kreol dan en lanvironnman miltileng: deskripsyon ek lanaliz dinamik bann lalang Kreol
Lefe globalizasyon pli resan in fer ki bokou popilasyon kreolofonn in bouz ver bann zón ekonomik pli devlope. An rezilta, bann nouvo kominote kreolofonn in devlope andeor zot teritwar natif, tel ki bann kominote Aysyen dan Nor Lanmerik, bann kominote kreolofonn an Frans ki sorti dan son bann departman Outremer, bann Morisyen dan Lostrali e bann Seselwa an Angleter. I annan bann nouvo migran kreolofonn dan bann kominote Kreol etabli ki ekonomikman devlope, par egzanp, bann Aysyen an Giyann e dan lezot landrwa dan Karaib. Imigrasyon ver bann zón kreolofonn i osi kree bann nouvo apranti lalang Kreol. Globalizasyon in osi anmenn en difizyon bann lalang Kreol ki san presedans, e sa i enkli difizyon atraver bann lendistri lalang ek kiltir. Ziska prezan, sa bann nouvo sityasyon sosyolengwistik ki propaz lalang Kreol pa ankor preski ganny dekri. Pareyman, nou konn tre pe lo lenpak sa mouvman migratwar lo dinamik bann lalang Kreol. Nou kapab azout letid lo lorizin ek evolisyon bann lalang Kreol avek sa tenm osi.
E. Gramer Kreol: tipolozi, varyasyon ek lansennyman
Deskripsyon bann sistenm lalang Kreol (fonolozi, gramer) i ankor reste neseser. Lanaliz bann varyasyon Kreol ek zot sistenm lengwistik pa ankor satisfezan. Sa tenm i anmenn ansanm bann kontribisyon ki esey analiz e esplik bann sistenm fonolozik, morfolozik e gramatikal dan en perspektiv tipolozik.
Sa tenm i osi enkli bann travay lo gramer pour lansennyman. Annefe, an Ayti, Sesel ek Moris, ensi ki dan bann Departman Franse, bokou kestyon i leve konsernan bann model gramer e lizaz lanaliz lengwistik pour formasyon ansenyan e pour lansennyman Kreol koman premye lalang.
Kestyon pour konsidere
Bann topik ki kapab ganny adrese, swa koman prezantasyon endividyel oubyen koman latelye (silvouple, kontake bann organizater) i enkli:
- bann dyaspora Kreol ek zot pratik lengwistik
- bann varyete Kreol ki’n devlop andeor zot teritwar natif
- varyete lengwistik bann nouvo apranti Kreol
- koegzistans Kreol ek Franse
- devlopman progranm alfabetizasyon an Kreol
- progranm ledikasyon bileng ki entegre lalang Kreol
- literatir bann pei kreolofonn
- leta resers lo bann korpous lalang Kreol
- devlopman Kreol dan lekol
- morfolozi, sentaks, eks. bann lalang Kreol
- letid lo evolisyon bann lalang Kreol atraver letan
- relasyon ant bann lalang Kreol avek bann lalang popilasyon lesklav (bann lalang Afriken, Malgas, eks…,)
- listwar, lanvironnman ek sosyete kreol
- kreolizasyon ek devlopman bann sosyete Kreol
- filozofi ek listwar bann lide dan bann sosyete kréol.
Lorganizasyon ek kalandriye
Bann prezantasyon ek propozisyon latelye i kapab ganny enkli dan enn bann tenm kolok oubyen dan en tenm ki annan lyen avek enn ou plizyer lezot tenm.
Propozisyon pour prezantasyon oubyen latelye (groupman 3/4 prezantasyon) an Franse, Angle oubyen nenport Kreol Franse ki enkli ladres ek lafilyasyon enstitisyonnel sa partisipan i bezwen ganny anvoye lo ladres imel Ciec.Sez2018@gmail.com avan le 29 Zanvye 2018.
Rezimen prezantasyon/latelye i merit dekri son tenm, detabes, rezilta ki ekspekte, e i pa devret depas 3000 karakter oubyen 500 mo (enkli bibliografi). Soumet 2 kopi propozisyon, enn anonim (ki pou servi pour seleksyon), e enn avek non loter, son ladres e son lafilyasyon enstitisyonnel.
Apre evalyasyon, bann kandida ki’n soumet propozisyon a ganny notifye si zot propozisyon in ganny aksepte oubyen rezete apartir le 9 Avril 2018.