Sant’Andria o Halloween ?

FR : Saint André ou Halloween ? Le résultat du match

ES : ¿San Andrés o Halloween? El resultado del partido

PT : Santo André ou Halloween? O resultado do jogo

IT :

DE : Der heilige Andreas oder Halloween - ein Spielbericht

Dapoi qualchì tempu rinvivisce¹ pian pianinu a festa di Sant'Andria, u 30 di nuvembre. Festa d'azezi in opposizione à Halloween ? O vera festa bella nustrale ch'ellu ci vole à salvà ? Avemu circatu di rifà u macciu.

U 30 di nuvembre hè dunque Sant'Andria. Hè a festa patrunale di parechji paesi corsi (Oletta, Biguglia, Sant'Andria di Boziu, Sant'Andria d'Urcinu, Sant'Andria di u Cotone, Ersa, Loretu, A Crucichja...).

Hè à l'orìgine una festa pagana, marca u passagiu da l'auturnu à l'inguernu.

In certi lochi, tandu, i zitelli, vestuti di vestiti frusti è cù e faccie mascherate di carbone, andavanu à pichjà à e porte di a ghjente per dumandà a limosina, un dulciume, qualchì bombò. C'era ancu una prigantula chì i zitelli dicianu quand'elli pichjavanu à e porte :

Aprite ! Aprite à Sant'Andria

Chì vene da longa via

Hà i pedi cunghjalati

È hà bisognu di riscaldassi

D'un bon bichjer' di vinu !

Tandu, u patrone di casa apria a porta di a so casa à i zitelli è li rigalava frutta secca è biscotti (ùn fate micca beie vinu à i zitelli - l'abus d'alcool est dangereux pour la santé).

Sò parechji anni avà chì a festa ripiglia fiatu. Quì in Appiettu, in Rutali, in Prupià, in Aiacciu, in Bastia, in Calvi, in U Purettu in Brandu, in Pacciunituli, à A Soccia.

Cum'è spessu, i Corsi, famiti di cunsumazione è di mundializazione, si lampanu à buzeffu per festighjà Halloween. I più azezi trovanu à dì chì Sant'Andria pè i zitelli hè recente è micca tradiziunale. Allora avemu circatu di fà u macciu :

Contr'à Sant'Andria :

Era un santu festighjatu assai in Corsica, si ritrova in parechji lochi corsi : Sant’Andria di Boziu, Sant’Andria d’Urcinu, Sant’Andria di u Cotone. Hè festa dinù in Oletta, Biguglia (è d'altri paesi dinù ? Mettiteci un cummentu). Ma micca in tutti i paesi, quessa hè vera.

Per Sant'Andria :

- U scopu saria di festighjà Sant’Andria senza fanne una festa à l’usu Halloween corsu incù maschere d’omi pulitichi corsi venduti à a Foir’Fouille.

- Sant’Andria pò diventà a festa di a sparghjera, à a seguita di San Martinu (a festa di e vindemie), è n’avemu bisognu in sti tempi d’individualismu è d’egoisimu per mantene un liame suciale chì parte in pistìcciuli da per tuttu in Corsica. Hè per esempiu ciò ch'ellu si face in Oletta, cun l'associu L'Alivetu.

- Sant’Andria ùn hè micca solu una festa nustrale : In Rumenia hè un santu maiò. Hè dinù u patrone di a Scozzia. In Bono (Sardegna) facenu quella sera a festa di e zucche. Quale hà dettu chì tradizione ùn hè micca apertura ? Pò esse l'occasione di fà scambii cun d'altri paesi.

- E facce mascherate di carbò ci rammentanu i nostri misteri tradiziunali : mazzeri, streghe, murtuloni, lacrimanti...

- Ùn hè micca faciule d’organizà e serate « Sant’Andria » in i pubs, cantine è discuteche. Almenu chì i dj mischinu e prigantule cun David Guetta. Bon, n'avemu vistru d'altre...

Allora ben’intesa, sta festa ùn esistia micca in ogni paese di Corsica. Ma e tradizione ùn tornanu à inventassi ? À partesi da u nostru vechju fondu di tradizioni (pagane è dopu cristianizate), ùn si puderia creà qualcosa di novu, una festa pè i zitelli, ma ancu pè i maiò, ingiru à a spartera, à u ligame suciale ? È micca sempre nant'à a cunsumazione è l'americanate.

Serà sempre megliu di festighjà stu ghjornu à l’usu nostru piuttostu ch'è d’esse e sempiterne vìttime di a mundialisazione !

Eppò hè sempre megliu chì u black friday (avete da vede chì quessa dinù hà da vene ind'è noi da quì à pocu...)

Vulete signalacci una festa, un usu, un evenimentu in u vostru paese ? Scriviteci un cummentu.

1  renait renasce renace rinasce

[[{"fid":"763","view_mode":"default","type":"media","attributes":{"height":"477","width":"560","class":"media-element file-default"}}]]

Pour en savoir plus sur Sant'Andria : /