Skip to main content

A legenda di l'amanduli fiuriti

Adattazione

Fola fuletta, alitu sognu piglia u to volu . . ...

Cursichella dopu à a caduta d'Aleria  fù data à u Papa è ellu a rigalò  à u Rè di l’Aragonu in lu mil’è duiecentu ottant’unu, à nant’à a bandera  corsa di l'epica,  dicenu chì i quattru capi  mori sarianu quelli di quattru rè mori tombi da l'Aragunese…  è puru  i sarracini ogni tantu  sbarcavanu  è s'arrubavanu ropa è ghjente.  

In Balagna, ci era una pasturella niulinca Anghjula Dea, chì impiaghjava, ma un ghjornu  fù rapita  da un Rè sarracinu chì maravigliatu da a so bellezza ne fessi a so prascelta.

Divintò a prascelta  ma a Corsica li mancava,  avia a brama  di vede a so famiglia e so muntagna è dinù a neve d'inguernu ...è turnò  malata persa. U Rè fessi vene tutti i medichi,  ma nimu truvava a cagione di u male, si ne  muria…à l’ultimu, u Rè addisperatu,  chjamò un astrologu chì à u lampu induvinò l’origine di u male. Ellu disse «  Currite à piglià trè centu amanduli fiuriti è traspuniteli in giru à u palazzu, senz’altru,  ùn aspittate u prossimu veranu. » L’ordine fù datu, l’amanduli posti è à l'entre di marzu sottu à un celu nebbiacosu, u Rè purtò  a moglia debbule assai à nant’ à u balcò…

 

è tandu, Tramuntana, è duie o trè aliti è ancu un ziffulellu fessinu vulà tutti i fiori di l'amanduli chì parianu fiochi di neve. A pasturella maravigliata, si misse à ride è à ballà, li si paria d’esse vultata  in a so Cursichella.  Sta neve amandulina avia addulcitu a so vita in stu paese, avà amicu, induve l’amore di un Rè più forte chè a morte avia ingranatu a so vita

Dicenu ind’è mè ch’ellu hè biancu cum’è neve l’amandulu coltu d’aostu…Fola fuletta a meia hè detta…

 

Rifarenze

fola tradiziunale portughese ( in lu rughjone di l'Algrave), adatta in corsu induve esiste dinù un versu di sta legenda.